កំណាព្យទី ០៨ ：បុណ្យភ្ជុំហើយកូន

កំណាព្យទី ០៨ ： បុណ្យភ្ជុំហើយកូន
កូនៗជាទីស្រលាញ់របស់ម៉ែ តើកូនមាននឹកដល់ម៉ែខ្លះដែរទេ ? ប៉ុន្ដែចំណែកម៉ែវិញ គឺពិតជានឹកកូនៗទាំងអស់គ្នាខ្លាំងណាស់ តើកូនអាចមកលេងម៉ែផងបានទេ ....?
                       
                     រដូវបិណ្ឌភ្ជុំ ម៉ែយំចាំផ្លូវ
                   ( បទពាក្យ៨ បន្ទាប់ធម្មតា )

✍ ម៉ោងបួនទៀបភ្លឺម៉ែឮបរា ( បរាភវសូត្រ )
      ម៉ែផ្អៀតសោតាប្រាថ្នាចាំស្ដាប់
      ពិរោះលន្លោចហាក់ដូចសារសព្ទ
      រៀបរាប់រ៉ាយរាប់ប្រាយប្រាប់រូបម៉ែ ។

✍ ថាកូនឃ្លាតឆ្ងាយតែកាយទេថ្លៃ
      រៀងរាល់យប់ថ្ងៃស្រម៉ៃតែស្រែ
      ឃ្លាតតែមួយថ្ងៃអាល័យមួយខែ
      ចិត្ដមិនប្រួលប្រួលប្រែសោះឡើយ ។

✍ មួយពីរបីរោចម៉ែដូចមិនខ្វល់
      ដប់រោចចាប់ឆ្ងល់រចល់ឥតស្បើយ
      ព្រឹកថ្ងៃម៉ែត្រូវចាំផ្លូវត្រាណត្រើយ
      ទ្រូងម៉ែឥតណ្ហើយបាត់អស់ក្ដីសុខ ។

✍ ទូរស័ព្ទក៍បាត់ប្រែស្ងាត់សូន្យឈឹង
      ម៉ែអស់រំពឹងដេកធ្មឹងសំកុក
      ចាំទាំងធុញថប់សន្លប់ចាប់ចុក
      ឱរាក្ដួលក្ដុករំអុកនឹកកូន ។

✍ វិលមកវិញណាជីវ៉ាមាសម្ដាយ
     ទោះគ្មានប្រាក់ចាយសប្បាយបងប្អូន
     បើកូនវិលហើយម៉ែស្បើយស្រពោនុន
      សូមកូនធ្វើក្បួនសណ្ដូនរូបម៉ែ ។

✍ ទុក្ខព្រោះចង់ជួបរួមរូបពិសី
      អត់ឃ្លានគ្មានថ្វីឥតបីត្អូញត្អែរ
      សុំត្រឹមជួបភក្រ្ដវរលក្ខណ៍មាសស្នេហ៍
      វិញមករកស្រែកុំប្រែណាកូន ៕ ៚

រូបភាព ហ្វេកប៊ុក

ងន សារ៉ាវុធ